Tsegmee's corner

So You Think You Can Dance (TOP 10)

2008-07-17T17:28:00.001-07:00

Та бүхэндээ энэ өдрийн түмэн амар амгаланг ирэн мэндчилье! Блогдоо бичлэг шиг бичлэг оруулалгуй нэлээд хугацаа өнгөрсөн байна шүү. Ажил төрөлдөө түүртээд ч тэрүү ихэнхдээ өөртөө таалагдсан, сүүлд үзсэн видеонуудаараа блогоо услаж байлаа. Яагаад услаж байна гэж бичив гэж зарим нэг уншигч маань асууж юуны магад. Би нэлээн дээр оруулсан нэгэн бичлэгтээ блог гэдэг бол яг цэцэг шиг байдаг юм билээ гэж хэлжийсэн шиг санагдаж байна. Харин цэцэгчин нь би өөрөө. Тэгээд цэцэгээ байнга л усалж тордохгүй бол амархан гундчих гээд байдаг эд билээ. Сүүлийн хэдэн сар ч муу блог маань их л ангаж цангасан байхдаа зайлуул. Өнөөдөр харин зав гарсных сайн гэгч нь услаад авъя (ингэж бичдэг билүү ?) байз. За үндсэн сэдэвтээ оръё. Та энэ баруун талд оруулсан зургийг харжийнуу ? (чаталсаар байгаад ингэж бичдэг болсон байна шүү дээ. Ул нь бол харж байна уу гэж бичих ёстой гэжүга) Наад зураг чинь миний хамгийн их үзэх дуртай ТВ шоуны маань зураг байнам. So You Think You Can Dance гэдэг нэртэй FOX сувгаар 3,4 өдөр гардаг бүжгийн тэмцээн. Ээ дээ мөн ч сайхан energetic (эрч хүчтэй) шоу даа. Гэхдээ хааяа даа ажил төрлийн нөхцөл байдлаас болоод зарим ангиудыг нь үзэж чадахгүй байгаа. Хүсэхэд хясна гэгчээр яг ажил дээр байхад гарахыг нь яана. Аз болоход интернет гэж сайхан ертөнц өнгөрснийг маань харуулж ирээдүйг маань харуулах нь холгүй байх юмдаа.Өчигдөр харин дуртай шоугаа бүхлээр нь үзэх алтан боломж тохиолоо. Одоо ч тэмцээн маань естой ид дундаа оргил үе дээрээ явж байлээ дээ. Америкын 10-н шилдэг бүжигчин (Top 10 dancers) үлдсэн гээд хэлчихэд нэг их хэлсдэхгүй байхаа. За тэр дундаас миний шүтээд байгаа хэд хэдэн бүжигчид байна. Chelsie, Courtney, Katee, Kherington, Will (Хэрэв та эдгээр оролцогчдын талаар дэлгэрэнгүй мэдээлэл авахыг хүсвэл тус бүрийнх нь нэрэн дээр дараад орж үзээрэй). За даа бараг энэ 5-ын хооронд л хамгийн гол өрсөлдөөн гарах байх. Бас нэмээд хэлчихэд энэ удаагийн Season 4 шоу маань ерөнхийдөө эмэгтэйчүүд давамгайлсан тэмцээн гээд хэлчихэд ч гэсэн буруудахгүй байх. Эрчүүд нь их сул байлээ. Ганц залуу л гялалзаад байгаа юм. Тэр нь дээр хэлсэн Will. Ёстой л бүжгийн төлөө төрсөн амьтан байна лээ дээ. Тэгэхээр 4 охин, нэг залуугын хооронд (4 girls vs. 1 boy) гол дайн болох байх. Харж л байя даа. Хэн хүчээ дайчилж, шантралгүй хөдөлмөрлөж чадсан нь энэ тэмцээний ялагч болж алдар хүндийн тавцанд гарах байх. Өнөөдрийнхөө бичлэгийг нэлээд өвөрмөц сонирхолтой болгох үүднээс зурган болон видео бичлэгүүд давхар хавсаргаж орууллаа. Зургаа бол slide.com дээр бэлдээд оруулчлаа. Ганц гэм нь миний блогийг Google Reader-ээр уншдаг андуудад маань харагдахгүй байж магад. Тэгвэл байшдээ энэ линк дээр ороод эсвэл зурган дээр нь дараад үзэж болно шүү.

Нээрээ би Mонголын NTV сувгаар гараад байгаад энэ шоуны монгол хувилбар болох "Би Бүжиглэж Чадна" (Энэ тэмцээний талаарх бичлэгүүдийг хайсан чинь орлоо дээр хэдэн дугаар нь байна.
Гэхдээ төлбөртэй болохоор та бүхэн карт авч байж л үзэх байхдаа.) гээд шоуг сонирхлоо. Нэлээд ч хэдэн ангийг нь харлаа. Ул нь манай Монгол охид хөвгүүд маань сайхан л бүжиглэдэг юм билээ. Гэхдээ нэлээд хэдэн юм дутагдаад байгаа нь тодоос тод харагдаж байна лээ. Юу вэ гэхээр жүжиглэх чадвар, өөртөө итгэлтэй байдал, яг сэтгэлээсээ бүжиглэж чадахгүй нэг л биеээ бариад байгаа юм шиг шинж ажиглагдсан. Эндхийн бүжигчид, залуучууд яаж бүжиглэж байна гээч. Яаааяа... (бишрэв) тэр өөртөө итгэлтэй байгаа байдал, тэр дүрдээ уусаж байгаа байдал, тэр биеээ тайзан дээр чөлөөтэй авч яваа байдал гээд л. Үнэхээр гайхалтай. Манай Монгол залуучууд маань эдгээр шоунуудыг үзэж суралцаж байгаа байх гэж найдаж байна.
Харин видео бичлэгүүдээ youtube.com дээр playlist хэлбэрээр бэлдэж орууллаа. Өчигдрийн болсон ээлжит дугаарыг бараг бүрэн эхээр нь оруулсан байгаа. Видеонууд маань богино богинохон бичлэгтэй ч гэсэн playlist болгочихоор шууд залгаад дараагийн бичлэг нь автоматаар тоглоод явчих болохоор та бүхэн санаа зоволтгүй. За ингээд олон зүйл нуршилгүй видео бичлэгүүдээ толилуулъя.

Энэ удаагынхаа дугаарыг ийнхүү жаргаая даа. Дараа дахин уулзатлаа түр баяртай.

Баабар, Бямбасүрэн, Лхагвасүрэн

2008-07-14T04:50:00.000-07:00

Үг студи үзүүлж байна. Энэ удаагийн нэвтрүүлэгт улстөрч Баабар, Бямбасүрэн, Лхагвасүрэн нар оролцлоо.
Part 1

Part 2

Англичуудыг бишрүүлж байгаа монгол бүсгүй

2008-07-01T13:58:00.000-07:00

Өөрийнхөө авъяас чадварыг Англи улсад гайхуулж яваа жирийн нэгэн монгол бүсгүйн талаарх видеонуудыг энэ удаагийн бичлэгтээ оруулж байна. Britain's Got Talented (Монголоор бол Авъяаслаг Англичууд гэж нэрлэх юм уу даа- юу гэж орчуулахаа мэдэхгүй жаахан тээнгэлзэв.) гэдэг нэртэй Английн ТВ-ийн томоохон шоу тэмцээнд Лувсандорж Оюун гэдэг монгол оюутан уран нугаралтаараа шүүгчдийн гайхшралыг төрүүлж өндөр үнэлгээ авч байна. Эрэлхэг зоригтой авъяаслаг энэ бүсгүйгээрээ монголчууд бид бахархахаас өөр аргагүй. За олон зүйл нуршаад яахав гэж бодоод доорх бичлэгүүдийг оруулж байна.

Монголынхоо нэрийг гаргаж яваа Оюунаадаа цаашдын сурлага хөдөлмөрт нь өндрөөс өндөр амжилт хүсье!

Ийм нэг нэвтрүүлэг үзлээ

2008-06-20T19:50:00.000-07:00

2007 ОНЫ ГОЛДМАНЫ БАЙГАЛЬ ОРЧНЫ ШАГНАЛД АЗИАС ШАЛГАРАГЧ

Ц. Мөнхбаяр

Монгол Улс, Улаанбаатар хот

“Мөнхбаяр нь иргэний нийгмийн манлайлагч болон өсөн гарч ирсэн хүн. Тэрээр
Монголд хариуцлагатай уул уурхайг хөгжүүлэх, байгаль орчныг хамгаалахад
сэтгэл, хүчээ зориулсан иргэдийн хамгийн хүчтэй, өргөн тархсан хөдөлгөөнүүдийг
нэгтгэхэд чухал үүргийг гүйцэтгэсэн юм. Мөнхбаяр чадварлаг бөгөөд чин
сэтгэлээсээ ажилладаг. Энэ хослол нь түүний хувийн болон хамт олных нь өмнөө
тавьсан зорилгод хүрэхэд гол түлхэц болсон.”

Дэлгэрэнгүй мэдээллийг эндээс

Монголын шинэ ХИТ дуунуудыг нэг дороос!!!

2008-05-16T16:30:00.001-07:00

Эвхрэн хөшин татан инээмой

2008-05-07T08:38:00.000-07:00

Блогдоо нэг салхи оруулахгүй бол болохоо байлаа та минь ээ.Үнэнийг өчихөд би гэдэг хүн ойрдоо амин хувийнхаа ажилд анхаарлаа илүү хандуулаад хөөрхий муу блогоо хатавч хавьцаа зогсоочоод шоовдорлоод яваад байсан лүд байншт. Эвий минь, Өөлхий минь гэж (гальт эрхлүүлэв). Өдрийн сайныг өнжин хүлээж, сарын сайныг саатан хүлээж, (хүлээсэн гэжхудлаа яриад юкэв зүгээр) өлзий ерөөл тэгширсэн энэ сайхан өдөр блог чинийхээ магнайг тэнийлгэхээр доорх хэдэн бичлэгээр өргөл барин мэндчилэв гэж. (дольдгинов)
Өчигдөр нэгэн буянт андын (Myshoobox) ачаар урьд хожид үзээгүй нэлээд хэдэн шог хошин нэвтрүүлэг үзэж хэсэгхэн хугацаанд ч гэсэн алжаал юугаан тайлж инээд хөөрөөр бялхав би. Тэгээд хөөр баяслаа ганцаар хүртээд юкэв та ч гэсэн инээхэд илүүдэхгүй гэж бодоод таалагдсан хэдэн хошин видеог түүвэрлэн инээдэн цэнхэр хадаг барьмой. Ганц гэм нь жаахан богино богинохон, олон тасархай бичлэгүүд байнам. Myshoobox андтай таарвал Та бичлэгээ бүхлээр тавьж болохсон болов уу гэж гуйх санаа агуулмой. Ямартай ч хүч хөдөлмөр, цаг хугацаагаа зарцуулан байж бидэндээ инээд бэлэглэж байгаа YouTube-ийн гишүүн Myshoobox анддаа (нэрийг нь мэдэхгүй болохоор ингэж дуудав) гүнээ талархсанаа илэрхийлэе!!!
Дашрамд дурдахад мань хүний цуглуулганд Монголын хошин урлаг анх үүсч хөгжсөн цагаас эхлээд өнөөг хүртэлх түүхийг өгүүлэхүйц маш олон сайхан дурсамжтай бичлэгүүд орсон байна лээ. (Одоогоор нийт 374 видео байна гээд боддоо)
Жишээ дурдабубас: Нөгөө Со, Бачка, Батзаяа, Чамка, Туяа гээд хошин урлагийн алтан харайцаануудын анх мандан гарч ирж байх үеийн түүхэн бичлэгүүд олноор орсон байнам. Нэгэн хоржоонтой зүйл сонирхуулбубас би гуай тэр үед юм мэдэхгүй жаахан бацаан байсан мөртлөө хошин шог үзээд инээж байгаа аав ээж 2-ыг хараад ойлгохгүй байж креслээсээ унан тусан элгээ хөштөл, эргэн хөрвөн инээдэг байсан гэжуга. За олон юм нуршаад юкэв Та зүгээр л доорх бидонуудыг толгой дараалан хяaруулан үзмой. Үзээд инээмой, Инээгээд хөшмой, Хөшөөд эвхэрмой, Эвхрээд босмой, Босоод дахин инээмой,... (Энэхүү үйлдлийг өдөрт дор хаяж 3 удаа давтан үйлдвээс таны лагшин тунгалаг оршмой!)
Та Myshoobox андыг мөн цуглуулгыг нь сонирхоё гэвэл энд тоншоод үтэр түргэн ормой!
Ээ тосоор гойж гэж мартах гэж байна хөөе, нээрээ энэ анд чинь бас вэбсайттай юм билээ. Энд нудран шур хийн ормой! (Яг энэ бичлэгийг мутарлаж суутал вэбсайтыг нь илрүүлдэг байншт. Ганбат гээд нэг сүрхий шавилган хүү байдаг болтой-дог-оо)

"Супер Онигоо" тэмцээн 2005 он

"Миний Гэр" ТВ Шоу- Хошин хувилбар

Тэвчээрийн чавхдас тасрах цаг байдаг

Цэнхэрийнхэн

Зохиолч (Сосорбарам залуудаа)

TV Cocktail Surprise

Уг нь блогдоо оруулчмаар бодож санаж явдаг сэдвүүд нижгээд л байдаг бөлгөө. Жишээ дурдабубас: Өөрийнхөө дотоод сэтгэл ертөнцийн талаар, юу бодож, юу хүсэж, юу төлөвлөж явдаг талаар мөн энэ Америк гэгч агуу гүрэнд ирээд тохиолдож буй саад бэрхшээлүүдээ нэг бүрчлэн сийрүүлж сэтгэл зүйн хувьд яаж хүлээж авч, хэрхэн тэмцэж байгаа талаар блог уншигч андуудтайгаа илэн далангуй шивэр авир хийж далан булчирхайгаа тоочмор л санагдах бөлгөө. Авч (Гэвч, Даанч гэсэн үгийг орлуулсан санаатай) би гэдэг хүмүүн чин урдах ажилдаа түүртэн шаналаад өдий болтол блог гэгч ай сав ертөнцдөө хангалттай цаг хугацааг зарцуулж үл чадмой. Гэхдээ бодож явахад бүтмой, сажилж явахад хүрмой гэгчээр энэхүү цөвүүн цагийг гаталж хөгжлийн мандалд хүрэх замдаа чадан ядан ч байсан хамаагүй блогтойгоо хийсэн андын тангаргаа үл тасламой гэж үнэнч пионерын андгай өргөмой.
Хаха... Бүүр хадуураад явжийна. Сониноос би блогчин андууддаа хандуулсан нэг их сүрхий уриатай болсон гэжүга. Ингээд энэ уриагаараа энэхүү бичлэгээ жаргаахгүй болбубас би гэдэг хүн хадууран салхидах шинж агуулмой.

Туг ч барьсан тугал ч хариулсан блогтойгоо хамт !!!

Шалдар булдар

2008-04-21T22:24:00.000-07:00

За хө өнөөдөр нэг бичлэг оруулъя байз. Энэ удаа онцгойлон сэдэв сонголгүй зүгээр л сүүлийн хэд хоногт өөрийн амьдралд дохиолдсон онцлох содон үйл явдлыг талаар энэ бичлэгт оруулахыг зорилоо.

Ажил

Нэг таатай ч гэх юм уу таагүй ч гэх юм уу мэдээ дуулгахад би дахин 2 ажилтай болсон. Хэдэн ногооныг нь бодохоор таатай ч юм шиг, хийх ажил, ачаалалыг нь бодохоор ямар юмны тааламж авах вэ дээ. Яг л урьдных шигээ тэрэгний морь шиг зүтгэж эхэллээ. Сүүлийн хэд хоног ч естой л хээрээр гэр хийж хэцээр дэр хийж явлаа гээд хэлчихэд хэлсдэх зүйл байхгүй байхаа. Жишээ нь: Нэг өдрийн цагийн хуваарь гэхэд ийм байна: 07:00 цагт шөнийн ажлаасаа бууна, 07:00-07:30 - өглөөний цай хөтөлбөр , 08:00 цагт гэртээ ирнэ. 08:00 - 12:00 хүртэл 4 цаг унтана. 12:00-12:30 - үдийн цай хөтөлбөр, 13:00 цагаас 2 дахь ажил дээрээ очно. 13:00 - 21:00 хүртэл ажиллана. 21:00 - 22:30 - амралтын цаг. (Машиндаа хоолоо иднэ, зав гарвал интернэттэй газар очиж жаахан сууна), 23:00-07:00 - Шөнийн буюу 1 дэх ажил дээрээ гозойно.
Гэхдээ өдөр болгон ийм хуваарьтай ажилдаггүй юмаа. 3 өдөр л яг ингэж давхарддаг юм. Бусад үед нь бол 2 ажил маань зөрж таардаг болохоор арай биенд амар. Гэвч амралтын өдөр гэж огт байхгүй болсон. (7/24)

Хичээл

Хүнд гар болж байгаа. Нэг хичээл интернэтээр авч байгаа. (Financial management for Nonprofit organizations) Даалгавруудаа цаг тухайд нь өгч амжихгүй л явна. Анх орж байснаа бодвол архагшаад хүнд гар болоод байнаа. Дөхүүлж байгаад болгондөө гэсэн юм яриад малгайгаа хажуулдуулчаад бохь тас тас хийлгээд сургуулийн коридороор ярвайгаад явжийшд. хэхэхэ

Сүүлд үзсэн кино

За энэ хэсэгт харин ч нэг ярих юм байгаа шүү. Сүүлийн хэд хоног хамгийн их давтамжтай гүйцэтгэсэн зүйл бол яаалтчгүй кино үзэх үйлдэл байлаа. Аз болоход нөгөө шинэ ажил маань овоо хийх зүйл бага байдаг юм байна. Тэгээд зав чөлөөндөө кино үзээд суугаад байх санаатай.Сүүлийн кинонуудаас:
1. Martian Child - Энэ их гоё кино байна лээ. Нэгэн өнчин хүүг Зохиолч залуу өргөж авснаар бүх үйл явдал эхлэндээ. Шинэ аав хүү хоёулаа их зовлон үзсэн болохоор нэг хэсэгтээ л тэдний хоорондын харьцаа үл ойлголцох байдалтай байна. Үргэлжлэлийг нь киноноосоо үзсэн нь дээр байхаа. Би өөрийн видео цуглуулгандаа хийсэн шүү. Энд дараад эсвэл энэ хажууд байгаа цонхон дээр дарж үзээрэй.
2. Dan in Real Life - Их амьдралтай кино. Бас нэг өрх толгойлсон 3 охинтой аавын тухай гарна. Хамаг бүхнээ хүүхдүүддээ зориулаад өөрийнхөө аз жаргалыг умартсан эгэл жирийн аавын амьдрал 3хан хоногийн дотор яаж өөрчлөгдөж байгаа талаар гарна. Үргэлжлэлийг нь киноноосоо үзсэн нь дээр байхаа. Би өөрийн видео цуглуулгандаа хийсэн шүү. Энд дараад эсвэл энэ хажууд байгаа цонхон дээр дарж үзээрэй.
3. The Brave One - Нэгэн аж жаргалтай хосын тухай киноны эхэнд өгүүлнэ. Жаргал дагаж зовлон гэгчээр нэгэн орой хос хоёр цэцэрлэгт хүрээлэнд зугаалж байгаад гэнэтийн дайралтанд өртөж үл бүтэх хэдэн залуусын зугаа болж зодуулж нөхөр нь тэр дороо амь насаа алдаж эмэгтэй нь хүнд байдалд орно. Энэ их уй гашууг яаж даван дуулж өөрийн сэтгэлийн шархаа ямар аргаар нөхөж байгаа талаар гарах маш сонирхолтой кино юм.Би өөрийн видео цуглуулгандаа хийсэн шүү. Энд дараад эсвэл энэ хажууд байгаа цонхон дээр дарж үзээрэй. Би ер нь зөгнөлт, адал явдал кино гэхээсээ илүүтэй амьдралтай бидний хэнд ч тохиолдолж болох үйл явдлын талар өгүүлсэн кинонууд үзэх их дуртай. Нэг талаасаа бидэнд сургамж болоод байх шиг санагддад юм. Танд л гэж хэлэхэд дээрх кинонуудыг узээд та харамсахгүй шүү. Завтай үедээ заавал үзэх кинондоо оруулаарай.

Сонсож байгаа дуу

Өөрийн IPod-доо дээр л нэг хэдэн монгол дуу хийсэн байсан тэрийгээ л байн байн давтаж сонсоор байгаад л таарлаа даа. Гэхдээ саяхнаас нэг дуу чихэнд хоногшоод байгаа. Шинээр л гарсан болтой. "Тэнгэрт харвасан од" гэдэг киноны дуу гэсэн.Та одоо сонсож байна уу? Хэрэв сонсохгүй байвал энд дарж сонсоорой. Бас нэлээд хэдэн шинэ монгол клипүүд өөрийн дууны цуглуулгандаа хийсэн шүү. Энд дарж эсвэл дээр байрлах цонхон дээр дарж шууд сонсоорой. Хийх зүйл уг нь их л байх юм. Блогтоо оруулмаар сонирхолтой сэдэвүүд орж ирээд л байна. Одоохондоо ажилдаа түүртээд тэр болгон цаг зав гаргаж чадахгүй байна. Хүн хүн өөр өөрийн гэсэн замаар явдаг болохоор зөвхөн өөрийнхөө тухай бичихэд ч гэсэн сонирхолтой байх шиг. Блогчин андуудынхаараа ойрын хугацаанд шур хийнээ. Бэлэн байгаарай
За ингээд өнөөдрийнхөө бичлэгийг үүгээр жаргаая даа. Ажилдаа явалгүй болохгүй нь

Бодлоо тэр чигээр нь буулгав

Ёстой гоё ажил байна цаана чинь!!!

2008-03-27T16:22:00.000-07:00

Сая блогчин андуудынхаа блогоор зочлоод явж байсан чинь Гэгээ-ний блог дээр естой сонирхол татсан мэдээлэл орсон байнаа. (Хэлэхгүй бол хэл загатнаад болдгүй)
Австралийн компанид Монголоосоо бүүр гэртээ сууж байгаад ажиллах боломж байна гэнээ. (Аутсорсинг хийдэг компани юм шиг ээ.) За энэ яахав гэхэд хамгийн сонирхол татаад байгаа зүйл бол шаардлагууд нь их энгийн юм байна. Манай залуучууд бол ихэнх нь хийчхээр юм шиг санагдлаа.
Жишээ нь ингэнээ:
1. Хурд сайтай, интернеттэй байнга холбоотой байх
2. MS Excel-н анхан шатны мэдлэгтэй байх
3. Дундаж түвшний англи хэлтэй байх (Интернэт хэрэглэж чаддаг байхад болно)
4. Монголд амьдардаг байх
Тэгээд байна шүү дээ цалин нь бас их боломжийн санагдлаа. Full time бол сардаа 450,000 төгрөг, Part time бол сардаа 250,000 төгрөг гэнээ. Бас цалингаа долоо хоног бүр тооцож байна гэнээ.
За би товчхон онцлох мэдээллийг нь энд бичлээ. Хэрэв та дэлгэрэнгүй мэдээлэл авахыг хүсвэл энд дарж уншаарай. Ааан тийм та үлдээсэн комментуудыг нь нэг бүрчлэн сайн уншаарай. Асуулт хариултууд байна лээ шүү.

Дашрамд хэлэхэд Монголчууддаа хэрэгтэй ийм сайхан мэдээлэл оруулсан гэгээн-ий хамт олонд талархалаа илэрхийлье! За Амжилт андуудаа!!!

Жич: Энэхүү мэдээллийн үнэн бодит эсэхийг мэдэхгүй байгаа болохоор ямар нэгэн
баталгаа гаргаж чадахгүй байнаа. Та бүхэн өөрсдөө ороод холбоо бариад сонирхоод үзээрэй!!!

Сонин хачин

2008-03-22T05:18:00.000-07:00

Нуруун дээрх ачаагаа бага ч гэсэн хөнгөлөөд сэтгэл санаа өөдрөг сайхан байна аа өнөөдөр. Уртаа гэгчийн амьсгаа авсан шээг, ийш тийшээгээ харж малийсан шээг, тэнгэр хангай бүүдгэр байх чинь бороо орох гэж байна уу даа гэсэн шээг додьгор явж байгаа юм бишүү би гуай. За яасан юу болов ? Аан хаврынхаа семестрийг цааш нь харуулчлаа. ахахахаха (бахдалтайн аргагүй инээв) Сүүлийн нэг долоо хоног ч естой алингаа алдатлаа дэвтэр ном эргүүллээ дээ. Сайндаа ч бишээ, цагт нь даалгавраа хийдгүйн ач гавъяагаа эдэлсэн минь тэр. Одоо ч чи тэгвэл гашуун сургамж аваа биздээ? Харин тэгсэн байхаа.(мушилзав) Ер нь байнашдээ би ганцаараа тэгэж хоцроогоод байсан уу гэхээр бас биш юмаа. Сураг сонсохнээ ангийн зарим нэг баагий нар сүүлийн хэд хоног нүүрээ угаах завгүй нуухаа авах тэнхэлгүй болтлоо суусан гэнэ шүү цаана чинь. хэхэхэ. Яагаад ингэх болов гэж ах хүү жаахан бодол бодов. Бодож бодож бодын шийр дөрөв, Явж явж багшийн арга барилтай холбоотой болж таарлаа. Нөгөө нутгийн минь багш нарын хэлдгээр цаг тухай бүрт шүүсийг нь шахаагүйгээс л тэр байх. Зайлуулдаа шинэхэн багш байна лээ дээ. Жаахан туршлага дутсан байхдаа хөөрхий.
За тэр багшийг шүүмжлэх яахав, Цэгмээ гуай чамд ч гэсэн дутагдал байгаа шүү!!!
Өнгөрсөн өвөл чи ямар сайн хүүхэд байлаа? Хоёр ажилтай хөл толгойгоо ялгахгүй болтлоо ажиллаж байхдаа дээрээс нь хичээл аваад яваад болоод л байдаг байсандаа. Тэр үеээ бодвол чи дэндүү их завтай байгаа шүү нөхөөр? Жаргал даадгүй моньд ш дээ энэ. (бухимдав)
хахахаха, нэг иймэрхүү бодол шүүмжлэлүүд л миний толгойд эргэлдээд байгаамдаа. Өөрийгөө эерэг сөрөг тал болгочоод л ярьж өгнө шүү дээ. Энэ толгойд их юм болноо гэж.
Сүүлд үзсэн кино
За тэр яахав, сониноос хичээлээ дуусгасных өөрийгөө урамшуулж бас нөгөө эерэг талдаа дольдогнож 10,000БС гэдэг нэг кино үзэв. Рекламнаас харахад овоо хөгжөөчихмөөр кино юм уу даа гэж бодсон бас нэг ч их сэтгэлд хүрсэнгүй. Яахав дунд зэргийн л юм билээ. Спец эффект багатай, Animation ихтэй, Яриа ихтэй , Аction багатай л кино юм уу даа гэж санагдсан.
Өөр чинь юу билээ? Аан тийм бас мэдээлэл.com дээр орсон байсан Дурласны маргааш гээд Монгол кино үзэв. Нээрээ манайхан естой түүхийгээрээ байна лээ дээ. Яагаад өөрсдөө санаа олоод зохиол бичиж болдоггүй юм болоо. Нэг америк киноны зохиолыг тэр чигээр нь хуулчихсан байна. Уг нь манай монголын урдаа барьдаг хэдэн залуу жүжигчид нь тоголсон байна лээ. За гэхдээ хийж байгаа нь их юмдаа. Түүхий ч байсан хамаагүй хийгээд байвал л юм сурна. Үзэгчдийнхээ сэтгэгдэл дээр дүн шинжилгээ хийгээд цаашдаа анхаараад ажилвал чанартай уран бүтээлүүд гарахгүй хаачих вэ.
Сүүлд сонсож байгаа дуу
За хө сүүлд чинь ямархуу дуунууд аялаад байгаа билээ гэж ? Аан тийм Жордан Cпаркс гэгч American Idol-ын тэргүүн магнайгийн дуунуудыг сонсож байгаа юм байна. Тэр дундаа No Air, Tattoo гээд 2 дуу нь их таалагдаад байгаа. Овоо чадалтай хоолойтой хүүхэд билээ. Дууг нь аялах тухайд бол би барахгүй юм билээ.Хааяа жаахан настртай байвал хальт дүнгэнэнэ гэжүга. Цаашаа байхгүй ээ. хэхэхэ
Монгол дуунаас гэвэл Бичүү - Ахиж би дурламааргүй байна гэдэг дууг сонсож байгаа. Энэ дууны ая нь их өвөрмөц стильтэй дажгүй юм билээ. Битгий л бас хуулсан байгаасай гэж залбирнам. Тэгсэн клип нь гэж бас л зодоон цохион, худал хуурмаг, гурвалжин дөрвөлжин л юм байна. Өөр юм зохиож болдоггүй юм байхдаа. Бас л аюултай хүмүүс шүү дээ.За ер нь миний сүүлд сонссон дуунууд бүгд дээр байгаа даа.
За ингээд бичлэгээ нэгэн сайхан уриагаар өндөрлөе дөө. Өнөөдөр яагаад ч юм нэг л үг эвлэж өгөхгүй байна. (Сүрхий бичдэг ч юм шиг хэхэхэ)

Бүгдээрээ аливаад бүтээлч сэтгэлгээтэй хандацгааяаа!!! Хүн дууриах биш харин өөрсдөө үлгэр дууриал болцгоое л доо!!!!

Блогчдын нэгдсэн сүлжээ

2008-03-12T08:55:00.001-07:00

Миний блогоор тухлан саатаж байгаа танд энэ өдрийн амар амгаланг айлтгая!
Сая ажил дээрээ сууж байтал нэгэн санаа зурс хийн толгойд орж ирлээ. Энэхүү санаа маань блог хөтөлдөг Монголчуудад хамааралтай юм. Гэхдээ зочин та ч гэсэн энэ санаан дээр сэтгэгдлээ хуваалцаж, зөвлөгөө өгч болно шүү!
Блогчин андуудаа! Бүгдээрээ нэгдсэн нэг холбоотой болвол яасан юм бэ ? Холбоо гэхээр нэг их нүсэр сонсогдоод байж магадгүй. Зүгээр л эхний шатанд нэг Yahoo групптэй болвол яасан юм бэ? (Хүн болгон дор хаяж нэг Yahoo ID-тай байдаг болохоор Yahoo-г сонголоо)Ингэж бодоод би нэг ийм mongolblog нэртэй групп нээчлээ. Хэрэв та Mонгол блогчдын группт нэгдэхийг хүсвэл энд дарж бүртгүүлээрэй. Бүртгүүлэхэд нэг их зүйл шаардагдагдаад байхгүй бүх хүмүүст нээлттэй байх болно.Хэрэв блогчид маань e-mail, messenger ID -раа холбогдоод авбал нэлээд олон давуу талуудтай байгаа юм. Заримаас нь дурдвал:
1. Блогтойгоо холбоотой шинэ содон мэдээ, мэдээлэл хоорондоо дамжуулах,
2. Зарим нэг асуудлаар санаа бодлоо солилцох,
3. Бие биентэйгээ дотно танилцах,
4. Шинэээр блог нээж байгаа болон блог сонирхогч залуустаа зөвлөгөө өгөх,
5. Уралдаан тэмцээн, Оны шилдэг блогчин шалгаруулах гэх мэт арга хэмжээнүүд албан есоор зохиох (Энэ санааг нэгэн блогчин анд (Ганбаа) гаргаж бас ч үгүй хэд хэдэн удаа шилдэг блогчинг шалгаруулж байсныг санаж байгаа байх)
6. Цаашлаад албан есны холбоо энэ тэр байгуулах талаараа ч ярьж болох юм шүү дээ.
Энэ санаа маань зүгээр ч нэг ороод ирсэн санаа биш юмаа. Би гэдэг хүн энэ блогчдын халуун тогоонд ороод нэг их удаагүй байгаа бөгөөд зав чөлөөнөөсөө шалтаалаад нэг их олон блогоор орж чаддаггүй юм. Тэгээд нэг зав гарахаар болж өгвөл бүгдэнгээр нь орчих санаатай байдагч цаг их ордог болохоор мэддэг хэдэн блогоороо ороод л таарах юм. Хараад байхнээ блогчид маань тус тусдаа өөр өөрийн гэсэн хүрээтэй (санаа нийлдэг гэх юм уу, эсвэл найзуудын, ажлын, мэргэжил нэгт гэх мэт хүрээтэй) тэгээд тэр тойрогтоо л эргэлдээд байгаа болохоор тэр болгон олон хүнд хүрч чадахгүй байх шиг. Жишээ нь: Банжиг-ийн блогчид (gogo-ийнхэн, blogspot-ийнхон, wordpress-ийнхэн ч ялгаагүй) гэхэд ихэнх нь яг л дотроо бие биентэйгээ харьцаад бусад сайт-д байгаа блогчидтойгоо тогтмол харьцаж чадахгүй байгаа юм уу гэж санагдаад байна. Хэрэв та бид нэгдсэн нэг сүлжээтэй болчвол бие биенээ илүү таниад мөн дээр хэлсэн давуу талуудаа ашиглаад олныг хамарсан, өргөн цар хүрээтэй үйл ажиллагаа явуулж болох юм. Аан тийм хэрэв танд энэ санаа таалагдсан бол өөрийн таньдаг блогчин андууддаа уламжлаарай.

Монголын блогчид маш олон болох болтугай!!!

Их түүх өгүүлсэн өөдөсхөн бор цаас

2008-03-02T10:26:00.000-08:00

Өнөөдөр та бүхэндээ нэгэн сонирхолтой зургын цуглуулгыг толилуулахаар зэхлээ. Эдгээр зурагнууд маань та бидний өдөр тутам хэрэглэдэг мөнгө гэгч тэр өөдөсхөн цаасны үе үеийн түүхийг харуулсан байгаа. Та бидний амьдралын салшгүй нэг хэсэг болж худалдаа, арилжаа хийх хамгийн гол хэрэгсэл болсоор ирсэн энэ алгын чинээхэн үрчгэр бор цаас бидний зөвхөн хэрэглээг хангаад зогсохгүй мөн хажуугаар нь маш их түүхийг өгүүлж, бидний туулж өнгөрөөсөн он жилүүдийн тэр сайхан гэгээн дурсамжийг дотроо шингээсэн байдаг юм шиг санагддаг. Сая эдгээр цомгоо бэлдэж суухад сэтгэл их хөдлөж, яг л өнгөрсөн үедээ эргээд очсон юм шиг насан багийн маань дурсамж хөврөөд сайхан байлаа. Мөн зарим хуучин дэвсгэртүүд нь та бидний өвөө эмээгийн маань гар дээр байсан гэж бодохоор цаанаа л нэг дотно санагдах юм . За олон зүйл нуршаад яахав та аяндаа өөрөө үзээд мэдрэнэ гэдэгт би итгэж байна. Зургаа тухлан сууж таалан соёрхоно уу

1924-1966 оны хооронд гаргасан Монгол улсын мөнгөн дэвсгэртүүд (1 хэсэг)

Цомгоо уг нь нэг болгоод тавьчихая гэсэн чинь болдоггүй юм байна. 50-аас дээш зураг багтдаггүй гэнэ. Тэгэхээр нь оны дарааллаар нь 2 хэсэг болгоод тавьчихлаа. Дараа олон зураг оруулдаг сайт олвол нэг бүлэг болгоод багцлаад тавьнаа. Аан тийм нээрээ нэг зүйл сануулахад: Хэрэв та миний блогийг Google Reader-ээр уншдаг бол энэ бичлэгт хавсаргасан зургийн цомог маань гарахгүй байх. Тэгэхээр та доорх линкээр орж тус тусд нь үзээрэй!

1 хэсэг (1924-1966)

2 хэсэг (1966-2006)

1966-2006 оны хооронд гаргасан Монгол улсын мөнгөн дэвсгэртүүд (2 хэсэг)

Сонирхуулж хэлэхэд эндгээр цомгийг би Slide.com дээр бэлдсэн юм шүү. Хэрэв танд таалагдаж байгаа бол энд дараад орж бүртгүүлээрэй. Эхлээд заавал бүртгүүлэх хэрэгтэй байдаг. Нэг их хэцүү зүйл байхгүй бараг алхам алхмаар нь зааварчлаад өгсөн байгаа. За энэхүү бичлэг маань таны алжаалыг багахан ч гэсэн тайлсан байх гэж найдаж байна.

Өнгөрснөө дурсахад зураг л тус болдог болохоор андууд минь болж л өгвөл мөч болгоноо цаасан дээр буулгаж байгаарай!

What's in Tsegmee's wallet ?

2008-02-20T01:16:00.000-08:00

Хүн болгон биедээ түрийвч гэх янз бүрийн загвар хийцтэй бяцхан хавтас, уут, сав авч явдаг билээ. Харин хэний түрийвчэнд юу байдгийг бид тэр болгон мэдэх боломжгүй юм. Бидний өдөр тутам хэрэглэдэг хэт энгийн юм шиг зүйл боловч дотор нь их олон төрлийн учир жанцантай зүйлс багтаж байх шиг. Ингээд өнөөдөр та бүхэндээ өөрийн хэтэвчээ нээж ямар эд зүйлс дотор нь явдгыг сонирхуулахаар зурган, тайлбартай бичлэгийг оруулж байна. Уг нь яг жинхэнээр зургийг нь аваад тавих боломж байсан боловч цаг заваас шалтгаалаад мөн зарим нэг хувийн мэдээллээ ил гаргах боломжгүй байсан учир жишээ зурагнууд тавьлаа. Та бүхэн маань ойлгох байх гэж найдаж байна. Миний хэтэвчинд:

Жолооны үнэмлэх
За эндхийн жолооны үнэмлэх гэж нэг иймэрхүү дүр төрхтэй юм байна даа.Миний гол нэрийн хуудас гэж хэлж болно. Хаана л очно энэ үнэмлэхийг шаардана. Хэрэв та урьд нь машин барьж байсан эсвэл монгол, олон улсын жолооны үнэмлэхтэй бол Калифорнийн жолооны үнэмлэх авахад нэг их түүртээд байх юм байхгүй дээ. Яг л манайх шиг бичгэн, жолооны шалгалт өгөөд тэнцэх юм бол таны гар дээр шинэхэн үнэмлэх чинь очно. Калифорнийн жолооны үнэмлэхний талаар дэлгэрэнгүй мэдээлэл авахыг хүсвэл энд дарна уу.

Дебит карт
Харилцах дансны карт гэх юм уу даа. Миний хамгийн их хэрэглэдэг карт бол энэ байгаа юм. Өдөр тутмын төлбөр тооцоогоо энэ картаараа хийнэ дээ. Мөнгө төгрөг тоолж толгойгоо гашилгана гэсэн юм байхгүй цаг хэмнээд, цэвэрхэн, естой амар эд юм билээ. Эндхийн ихэнх банкиуд харилцах данс нээхэд шимтгэл авдаггүй бөгөөд ийм карт, бас чек дэвтэр үнэгүй дагалдаж ирдэг юм. Дэлгэрэнгүй мэдээлэл авахыг хүсвэл энд дарна уу.

Social Security Number (SSN)
За энэ их чухал дугаар байгаа юмаа. Ийм дугаартай болчих юм бол та ажил хайх, зээлийн карт авах, байр түрээслэх, машин авах гээд л бараг бүх зүйл нээлттэй болно гэсэн үг. Жолооны үнэмлэх шиг миний гол нэрийн хуудсуудын нэг. Хэрэв та оюутан бол ийм дугаар авахад нэг их хүндрэл байхгүй юм билээ. Сургуулийнхаа гадаад оюутны хэлтэс дээр очоод зохих өргөдлийн маягтууд бөглөөд тэгээд л бүсдыг нь тэд хийчихдэг юм. Дэлгэрэнгүй мэдээллийг эндээс аваарай.

Кредит карт
Дебит картаас ялгагдах гол онцлог нь та зээлээр тооцооо хийж болоход оршиж байгаа юм. Өөрөөр хэлэх юм бол та юу хүссэнээ энэ картаар авах боломжтой гэсэн үг. Аан тийм нэг зүйл залруулахад хүссэн бүхнээ ч арай биш юмаа, таны зарцуулах хэмжээ хязгаарлагдмал шүү. Өөрөөр хэлэх юм бол та хэр сайн зээлийн түүхтэй байна төдий чинээ таны зээлээр зарцуулах мөнгөний хэмжээ нэмэгдэнэ. Хамгийн гол нь сарын дотор эргүүлэн төлөх нөхцөлтэй. Эхэндээ би энэ картаар бараг таалагдсан болгоноо авдаг байлаа,тэгээд картынхаа төлбөрийг хийхэд л естой уур хүргэнэ дээ. Ийм их мөнгө үрчихсэн юм уу гээд л өөрийгөө зүхэх хэрэг гараад байдаг юм. хэхэхэхэ. Гэхдээ энэ картыг шал дэмий эд гэж хэлж байгаа юм бишээ. Зээлийн түүхтэй болох, (Энэ улсад хүн болгон өөрийн гэсэн зээлийн түүхтэй, тэгээд хэрэв зээлээ цаг тухай бүрт нь төлж байсан бол дараа дараагийн зээлийн хэмжээ нь нэмэгдэж, машин, байшин, бусад том хөдлөх, үл хөдлөх хөрөнгө авах, түрээслэхэд маш чухал нэмэртэй.) интернетээс юм худалдаж авах, бас заримдаа огт мөнгөгүй болцон үед эсвэл нэг том зүйл авах гэхээр таны хуримтлуулсан мөнгө хүрэхгүй байх үед ашиглахад тохиромжтой гэж боддог. Дэлгэрэнгүй мэдээллийг эндээс аваарай

Оюутны үнэмлэх (Student ID)
Энэ миний гуравдагч нэрийн хуудас юм уу даа. Ихэнхдээ сургууль дээрээ л хэрэглэнэ дээ. Номын санд суух, сургуулийн гуанзанд хоол идэх, сургалтын төлбөр төлөх, янз бүрийн оюутны хөнгөлөлттэй үйлчилгээ авах үед л ашигладаг гэж болох юм. Та оюутан болсон л бол ийм үнэмлэхтэй болчихоно гэсэг үгдээ.

Даатгалын үнэмлэх (Medical Insurance Card)
Англи нэрээрээ байсан нь дээр юм шиг байнаа, Монголруу орчуулахаар хачин хачин нэр гарч ирээд байна. Зэ энэ бол миний даатгалын дэвтэр гэсэн үг. Гэхдээ би нэг их ашиглаж үзээгүй ээ. Слава богу. Бие хар муудвал л ашиглах байлгүй дээ. түй түй муу ер. Гэхдээ байна ш дээ энэ ашигладаггүй зүйлийн төлөө би жил болгон 1000-аад доллар төлдөг гээд боддоо. Мөнгийг нь бодохоор өвдөөгүй ч гэсэн эмч дээр нь гүйж очоод үзүүлээд надад тариа хий, эм бичиж өг гээд байдаг юм билүү гэж бодоод байгаа. хэхэхэххэ.

Amazon.com карт
За энд бас нэг карт байна. Ихэнхдээ амазоноос юм авахаар болвол хэрэглэдэг юм. Бусад үед бол үхмэл байна даа хөөрхий. Тэгээд ч би энэ картны давхар эзэмшигч нь болохоор сарын тооцоо энэ тэрийг нь хийдэггүй юм. Картны гол эзэмшигчид картны тооцоогоо өгчдөг юм. Сонирхуулж хэлэхэд хэрэв та зээлийн карт авахад шаардлага хангахгүй байвал зээлийн карттай таньдаг найз, хамаатныхаа давхар эзэмшигч нь болоод тэр картаа хамтран эзэмшигч болох боломжтой байж магад шүү. Асуухад илүүдэхгүй.Дэлгэрэнгүй мэдээллийг эндээс аваарай

ААА карт (AAA member card)
Энэ карт бол машинтай хүмүүст зориулсан карт хэлж болноо. Таныг жолоо бариад явж байхад гэнэт машинд чинь гэмтэл гарах, дугуй хагарах, баттери дуусах, зэрэг санамсаргүй тохиолдолд картан дээр байгаа утсаар тусламж дуудаад холбогдох үйлчилгээг нь газар дээр нь авах боломжтой юм. Дэлгэрэнгүй мэдээллийг эндээс.

Target gift карт
Энэ карт чинь сая өнгөрдөг кристмас, шинэ жилээр хамгийн их эрэлттэй байсан бэлэг дээ. Би ч гэсэн хэд хэдэн ийм карт бэлгэнд авсан гэж байгаа. Одоо үед чинь хүмүүс бие биендээ ийм л карт өгчихдөг болсон байна шүү дээ. Санаанд нь таарахгүй юм авч өгч байснаас зүгээр л мөнгийг нь агуулсан ийм карт өгчихсөн нь хамаагүй дээр. Ялангуяа манай Монголд энэ картын үйлчилгээг хэрэгжүүлж чадах юм бол цагаан сараар баахан хэрэгтэй хэрэггүй, уранхай, өрөөсөн, нэг хөлийн оймснууд авч байснаас иймэрхүү карт аваад дуртай юмаа авчихсан нь хамаагүй дээр. хэхэхэ. Монголд байгаа тэр том их дэлгүүр, супермаркетууд карт гаргахад болохгүй гэх газаргүй шүү дээ.Дэлгэрэнгүй мэдээллийг эндээс.

Автобусны билет (Bus pass)
Эндхийн автобусны билет нь хүртэл соронзон туузтай, уншуулдаг гэх юм уу даа. Нэг өдөр хэрэглэх автобусны билет нь 3 доллар гэж байна. Өдөртөө багтаад хүссэн чиглэлээр хэдэн ч удаа явж болно. Харин билетгүй, мөнгөө төлөөд зорчино гэвэл суух болгондоо 1,25 цент гээд боддоо. Тэгэхээр билетээ аваад явчихсан нь хамаагүй дээр байгаа юм. Аан тийм тэгээд энэ соёлт нийгэмд чинь кондуктор гэдэг тэр чимхээд нудраад байдаг авгай чинь байхгүй болчихжээ. Автусанд ороход жолоочийн хажууд билет уншдаг машин байх жишээтэй. Тэнд нь авсан билетээ гулгуулаад л болоо.Манай монголд ч гэсэн хэрэгжүүлэхэд боломжтой л санаа шиг санагддаг юм.Дэлгэрэнгүй мэдээллийг эндээс.

Korean Air Skypass
Энэ карт гуайн ид шидийг үзээгүй л явна. Уг нь инернетээс харахнээ корэан айрээр нисэх болгонд миний явсан км нэмэгдэж тэгээд тэр заасан хязгаарт нь хүрч чадах юм бол урамшуулал авах эсвэл нэг удаа үнэгүй нисэх зэрэг их олон ид шидтэй юм байхаа. Одоохондоо учрыг олж чадаагүй ч түрийвчинд маань явсаар л байна. Байнга ямар нисдэг бишдээ.Дэлгэрэнгүй мэдээллийг эндээс.

Albertsons Savings карт
Энэ одоо бас л урамшууллын карт юм шиг байгаа юм. Над шиг өдрийн од шиг дэлгүүр ордог хүнд ч дээ ид шидийг нь үзэхгүй байгаад л нутаг буцах юм байлгүй дээ. Ихэнхдээ бэлэн, түргэн хоолны, пиццаны гарзруудаар явчихдаг болохоор дэлгүүр ороод юу ч авах юм билээ дээ. Хааяаа л нэг орж идэж үзээгүй, шинэ содон юм байвал авдаг юм.Аан тийм бас бэлэн мөнгө хэрэг болохоор ганц 2 юм авсан болж ордог юм. Сониноос карт хэрэглээд байхаар бэлэн мөнгөний гачигдалд орно гэсэн шинэ сонин үзэгдэл гардаг болоод байгаа. Жишээ нь: Зарим жижиг хоолны газруудруу хоол идэх гээд орохоор тэр картны машин энэ тэрийг нь тавьж чаддаггүй юм уу дандаа бэлнээр худалдаа хийнэ гээд ах баагийг жоохон сандаргаад авдаг юм. Өлсөж байгааг хэлэх үү ойр хавьд байгаа томхон дэлгүүрлүү, эсвэл АТМ машинтай газарлуу чавхдандаа. хэхэхэДэлгэрэнгүй мэдээллийг эндээс

2 долларын дэвсгэрт
Нэг мексик анд маань надад 2 долларын дэвсгэрт түрийвчиндээ хийж явбал мөнгө их орж ирдэг гэж хэлснээс хойш мухар сүсэг ч гэсэн нээрээ л мөнгөнд дургүй хэн байхав түнтийх болтугай гээд байнга хэтэвчиндээ авч явдаг болсон. Хоертын доллар чинь бусад дэвсгэртээ бодвол цөөхөн л байдаг юм шиг байна лээ.

10 төгрөг
Монгол хүн байна даа түрийвчиндээ улсынхаа мөнгөн дэвсгэртийг хийлгүй яахав. Хэдий мөнгө багатай ч гэсэн түрийвчээ хоосон байлгаж болдоггүй юм гэнэ лээ. Доллар, төгрөгөөр хэтэвч маань байнга дүүрэн байх болтугай гээд л хийж явдаг юм хэхэхэ. Нээрээ монгол дэвсгэртийн зургыг интернэтээс олох болов уу гээд эргэлзээд байсан чинь харин санасныг бодвол их олдож байна лээ. Бүүр зардаг юм байна гээч энэ гадаад хүмүүс. Бодвол тэр орон орны мөнгөн дэвсгэрт, зоос цуглуулдаг хүмүүс нь л авдаг байхдаа. Ebay дээр төгрөгийн дэвсгэрт, зооснууд маань хөөрхөн үнэд хүрдэг юм билээ. Та энд дараад орж сонирхоорой.
Эдгээрээс гадна хэтэвчинд маань чухал хүмүүсийн нэрийн хуудас, их дүнтэй тооцооны хуудас (юмыг яаж мэдхэв буцаах ч юм уу, эсвэл ямар нэгэн асуудал гарвал их хэрэгтэй байдаг юм),календар, өөрийн болон хайртын маань зураг (хайртыгаа санахаар зургийг нь гаргаж ирээд үзэх сайхан байдаг юм, өөрийн зураг бол ямар нэгэн бичиг баримт авахад хэрэг болж магад гээд л авч явна даа хэхэхэхэхэ өөрийгөө санана гэж юу байхав хэхэхэхэ) гээд овоо л их юм байдаг юм байна даа (одоо л мэдэв).
Дээрх тайлбаруудыг яг өөрийн мэдлэг, туршлага дээр тулгуурлаж хувь хүний өнцгөөс харж товчхон бичсэн болохоор зарим зүйл дээр дутуу дульмаг тайлбарласан байж магадгүй шүү.та дэлгэрэнгүй мэдээллийг авахыг хүсвэл тус бүрийнх нь линк дээр дарж үзээрэй. (Хэрэв танд нэмж хэлэх зүйл, шүүмжлэл байвал доор байгаа коммент дээр бичээрэй).
За ингээд Таны, миний түрийвч үүрд түнтгэр байх болтугай гэсэн ерөөлөөр энэ бичлэгээ жаргаая даа.

Улиран одогч 20 хоног

2008-02-13T09:46:00.000-08:00

Хайрт блог минь, Чөлөөт ертөнц минь, Бяцхан диваажин минь, Чамайгаа би ямар их санаа вэ ?
Би гэдэг хүн өнөө маргаашаа давах гэж унан босон явтал нэг л мэдэхэд блогоосоо хол 20 хоногийг ардаа үлдээжээ. Үнэнийг хэлэхэд бичлэг оруулах зав байсан уу гэвэл байсааан нуугаад яахав. Гэхдээ яагаад ч юм тохироо нь бүрдэхгүй байсаар өдий хүрчлээ. Ер нь боломжгүй байсан ч гэсэн блогд минь саатаж байдаг андуудынхаа урмыг хугалахгүйг хичээж зарим хэсгийг нь шинэчлэж байя гэж бодлоо. Тэгээд өчигдөр шөнө ажил дээрээ дуу, видео цуглуулгаа сэргээж суугаад нэг мөсөн шинэ бичлэг нэмээд оруулая гэж ший дээд энэхүү тэмдэглэлээ бичиж сууна. Энэ дашрамд миний блогд саатаж байдаг бүх зочиддоо чин сэтгэлээсээ талархаж явдгаа илэрхийлэе! (Тэр дундаа шилдэг блогчин Ганаа эгч-дээ намайг эзгүйд ч гэсэн блогт минь comment үлдээж байсанд маш их баярлалаа). Өнгөрсөн 20 хоногт миний амьдрал ерөнхийдөө нэг жимээр хөврөх шив дээ. Ажлаас гэр, гэрээс ажил гэсэн үндсэн маршруттай. Хааяадаа Лос Анжелес орж найз нартайгаа уулзах, идэж уух зүйлсээ цуглуулах, хичээлдээ суух, төлбөр тооцоо хийх гэх мэтийн ажил амжуулах гэж л жимээсээ хальт хазайх юм. Бусад үед бол жимээрээ л гэлдэрч явна.
Сониноос сүүлийн үед би нэг чатанд орох дуртай болоод байгаа. Тэгээд өнөөдрийнхөө бичлэгт энэ хобби-хоо талаар төрсөн санал сэтгэгдлээ та бүхэнтэйгээ хуваалцая гэж бодлоо. Нээрээ би энэ чатанд дуртай болоод зогсохгүй жоохон донтох талруугаа ороод байгаа. хэхэхэ. Орлоо, Найзууд дээр байрладаг энэ чатад маань над шиг л харь оронд сурч хөдөлмөрлөж байгаа Монгол залуус их ордог юм билээ. (Та хэрэв энэ чатруу орохыг хүсвэл энд дарна уу). Хүний нутагт амьдралаа дээшлүүлэх гэж ажиллаж, сурч байгаа нутаг нэгт андуудтайгаа уулзаж ярилцах ямар сайхан байдаг гээч. Хааяаа бүүр хэдэн цагаар чатлах үе гарна. Нээрээ Монголчуудын маань гишгээгүй газар, очоогүй улс гэж бараг байхгүй юмаа. Солонгос, Япон, Хятад, Герман, Франц, Польш, ОХУ, АНУ, Бельги, Турк, Энэтхэг гээд их олон орноос холбогдох юм билээ. Энэ чатны бас нэг онцлог нь зөвхөн бичээд зогсохгүй бас хоорондоо компьютерынхаа утсаар ярьж хүсвэл камераар ч бие биенийгээ харж болдогт байгаа болохоор илүү дотно, амьд харьцаа үүсгэдэг юм. Бид их олон сэдвээр ярилцана даа. Эх нутгынхаа талаар, улс оронд маань тулгамдаж буй асуудлуудын талаар, тэрнээс гарах арга замуудын талаар санал бодлоо солилцож, мэтгэлцэж, бүүр маргалдах тохиолдол ч гарна. Ер нь ихэнхдээ бол хамтдаа цагийг зугаатай өнгөрөөх л зорилготой байдаг юм. Хүний нутагт сурч, ажиллаж, амьдралынхаа төлөө тэмцэж байгаа нутаг нэгт ахан дүүс, үе тэнгийн андуудаа харахад үнэхээр бахархар сэтгэл төрдөг шүү. Хааяадаа өөрийн гэсэн эх орон гэж байхад яасан ч гэж бид ингэж харь оронд амьдарч байгаа юм бол гэж бодохоор эдгээр залуусаа өөрийн эрхгүй өрөвдөх юм. Хүний нутагт сайхан байна би эндээ үлдэнэ гэж хэлж байгаа ганц ч хүн би олж сонсоогүй. Бүгдээрээ л зорьсон хэргээ бүтээгээд эх орон, элгэн садан, амраг хань даа очноо гэсэн өөдрөг гэгээн мөрөөдэлтэй хүмүүс байна лээ. Тийм ээ, андууд минь! Зорьсноо бүтээгээд эх нутгийн зүг жолоо залах мөч та бидэнд удахгүй ирнэ гэдэгт би бат итгэлтэй байгаа шүү!
Өнгөрсөн 20 хоногт миний амьдралд тохиолдсон хамгийн олзуурхууштай зүйл бол яах аргагүй энэ чат байлаа. Энэ чатны ачаар би олон сайхан найз нартай болсоон.

Ингээд Гадаадад суугаа Монгол ахан дүүс минь дор бүрнээ эрүүл байж, зорьсон хэргээ бүтээгээд эх орондоо хурдан эргэж ирээрэй гэсэн сайхан ерөөлөөр энэ бичлэгээ өндөрлөе

Жич: Миний бие найруулан бичихдээ тааруу болохоор замбараагүй бичсэн байж магадгүй шүү. Та бүгд минь аль болох эвлүүлээд уншихыг хичээнгүйлэн гуйя. :)